CARITA HEUREUY

 1. MANG JUHA KASASAR DI TANAH SUCI

Ngalaksanakeun rukun Islam nu Kalima mangrupakeun harepan sakumna umat Islam, ngan Islam teu ngabeuratkeun diwajibkeunana ieu rukun, wungkul pikeun jalma nu mampu. Khususna di Indonesia, waragad pikeun ngalaksanakeun ibadah Haji teh kacida badagna, kabuktian teu sakabeh urang Islam Indonesia bisa ngalaksanakeunana.

 Geus jadi kailaharan yen satiap rombongan Haji Indonesia pasti aya nu diangkat jadi pamingpin rombongan, tugasna pikeun ngabingbing rombongan nalika aya di Tanah Suci. Ku sabab kitu, satiap nu diangkat jadi pamingpin rombongan, biasana jalma nu geus pernah ngalaman nincak ka Tanah Suci, hal ieu memang kacida pentingna, sabab teu satiap jama’ah haji ngarti tur apal kana tata cara ibadah haji, terutama kana basa urang Arab.

 Dina masalah bahasa, aya hiji carita nu mangrupakeun pangalaman salah saurang jama’ah Haji, nu kabeneran eta jam’ah haji teh urang sunda  kasebutna  Mang Juha , harita manehna tinggaleun ku rombongan, nepi ka manehna bingung neangan arah jalan balik ka tempat manehna jeung rombongan cicing, anu pernahna di deukeut Masjidil Haram. Rek nanya ka urang Arab nu aya didinya teu bisa bahasana, rek neruskeun leumpang teu apal ka arah mana nu kudu dituju, tungtungna Mang Juha ngahuleng, bari luak-lieuk susuganan aya urang Indonesia.

Barang keur bingung kitu rentang-rentang aya jalma nu pangawakanna siga urang Indonesia busekel hideung, jangkung teuing henteu, pendek teuing teuing henteu. Barang geus deukeut tuluy bae di Tanya ku Mag Juha:

 ”Punten bapa bade tumaros, dupi arah jalan ka Masjidil Haram ka palih mana?”.

 Nu ditanya rungah-ringeuh siga nu teu ngarti, bari ngajawab: “Boten Ngartos mas..?”.

Geuningan nu ditanya teh urang Tegal, nu bahasana jawa, atuh beuki bingung bae, Sakalieun tepung jeung urang Indonesia, urang jawa nu teu ngarti kana basa sunda. Barang keur bingung kitu jorojoy Mang Juha boga  pikiran, bari gegerendengan nyarita:

 “Ah…! urang jawamah biasana sok ngaji Qur’an jeung kitab gundul, urang nyoba di Tanya ku bahasa Qur’an”. Bari Tuluy pok Mang Juha nanya deui ka urang tegal tadi:

 ”Punten mas…! Ihdinash-Shiroothol Masjidil Haroom ?”.

 “Ohh…! Shiroothol Mustaqiim…!”  Jawab urang tegal bari nunjuk ka palebah jalan nu brasna ka Masjidil Haraam.

“Hatur nuhun mas…!”

 Geus kitumah tuluy weh Mang Juha neruskeun leumpang kana jalan nu dituduhkeun ku urang tegal tea. Tapi barang keur ngeunah leumpang, kadenge aya nu ngagorowok, barang dilieuk urang tegal tadi tea, sihoreng nalingakeun keneh, bisi kasasar meureun. Pokna teh bari ngagorowok:

 ”Waladh-Dhoolliin…. Mustaqiim…Mustaqiim..!”. Kituna teh bari pepeta siga tukang parkir, pedah jalan nu keur dituju teh aya tilu arah aya nu mengkol ka kenca, nu ka katuhu jeung nu lempeng. Memang bener nu lempeng nu brasna ka Masjidil Harom teh.

Caaag

2. JANGJI MANG JUHA

 Din hiji mangsa Mang Juha anteng maca koran hiji media, ngilikan warta berita nu anyar medal, kadenge manehna maca gegerendengan:

"Awas..tong nyoba-nyoba ngonsumsi narkoba..matak bahaya kana raga reujueng jiwa  awak bakal beak  ku zat-zat nu matak ngarusak,  Alah siah,  Aing jangji moal rek ngadeukeutan komo bari make nu ngaranna narkoba"

Tuluy deui Mang Juha maca berita sejenna, 

"Awas, ati-ati ka para lalaki,ulah sambarang ngagaulan istri, komo mun biasa meuli,sabab bahaya kana diri,  mun nyoba-nyoba ngalakukeun, awas inggis ku bisi,ayeuna aya panyakit nu obatna can kapanggih ku para ahli, nyaeta virus HIV Aids nu ngabahayakeun,  Alah siah, aing janji moal rek kikituan, mending oge pamajikan nu sah, sarua ngeunah malah leuwih ngeunah, bari moal aya panyakitan"

Tuluy Mang Juha mukaan deui lambaran eta koran, kadenge deui gegerendengan:

"MEROKOK DAPAT MENYEBABKAN KANKER, SERANGAN JANTUNG, IMPOTENSI DAN GANGGUAN KEHAMILAN DAN JANIN"

Sanggeus maca eta berita, Mang Juha kadenge gegerendengan deui nyarita:

"Alah siah, Aing janji, ti kawit menit ieu, jam ieu, poe ieu,  nepi ka saterusna, aing JANJI moal meuli deui ieu koran, "  Kituna teh, bari lung eta koran dialungkkeun ka carangka runtah, gejlig bae Mang Juha indit ka warung rek meuili ROKO.

Caaag

3. PIRAKU KUDU JEUNG SALATNA ONGKOH

"Pa DKM! Ku naon ieu teh, naha bet huleng jentul kitu, bangun aya nu dipikiran?," Ceuk saurang warga masyarakat nu jadi salah saurang donatur pangbadagna dina pangwangunan Masjid, nu ujug-jug datang ti tukangeun bari tuluy nanya ka ketua DKM, nu keur kukurilingan nitenan wangunan masjid nu anyar rengse diwangun.

"Muhun ieu teh rada aya nu diemutan..."Semu ngarenjag reuwas ketua DKM ngajawab

"Kurang naon deui atuh? Sok wakca baalaka nyarita ka kami!" Ceuk donatur nanya deui bari nawaran jasa.

"Ah, henteu kirang nanaon, sakieu mah parantos cekap, kantun eta panginten," Ceuk ketua DKM ngajawab, ngan teu kebat da kaburu dipotong omongan.

"Tinggal naon deui atuh, sok balaka ka kami! Ceuk Dontur nanya deui semu panasaran.

"Eta pangersa sim kuring teh ngemutan eta," Siga nu teu wani kedal, ketua DKM ngajawab deui, bari teu kebat deui da dipotong omongan.

"Enya sok nyarita, butuh naon deui ? Semen, pasir, bata, dana atawa butuh naon?" ceuk Donatur bari nangtang nawarkeun jasa deui.

"Ah sanes Pangersa, sanes eta nu diemutan, da tos rengse geuningan ngawangun masjid teh, kangge naon eta sadayana," Ceuk Ketua DKM ngajawab.

"Enya mikiran naon deui atuh?" Ceuk Donatur nanya deui.

"Sumuhun, ningal kana rengsena ngawangun mesjid mah sim kuring teh ngaraos reugreug, reueus, oge ngaraos bingah pisan, nepi ka kabingah ieu teh, teu tiasa dikedalkeun ku lisan saking bingah-bingahna,ngan nyaeta, nu janten emutan teh saupamina sumping waktos sholat, abdi mah janten nalangsa." Ceuk ketua DKM.

"Naha bet nalangsa?" Ceuk Donatur nanya panasaran. 

"Muhun, pami ningal sumanget masyarakat nalika ngawangun masjid mah, sim kuring teh reueus pisan, geuningan masyarakat teh katingalna meni saregut dina nyumbang jasa, boh danana, dayana sareng sajabina" Ceuk DKM rada panjang lebar.

"Enya kaasup kami meureun nya?" Ceuk Donatur ngareueuskeun lampah sorangan.

"Muhun kalebet salira, katampi pisan,  da pangageungna salira teh dina nyumbang mah, sakali deui haturnuhun pisan, mugia sing diwales ku Alloh kalayan wawales nu pangsaena mungguh Manten-Na, Aamiin," ceuk ketua DKM ditungtungan ku ngadu'akeun.

"Aaamiin, heueuh alus! Apan kudu kitu lain?" Ceuk Donatur.

"Leres pisan kitu kedahna, ngan eta nu janten pasualan teh, nalika sumping waktos sholat, naha sumanget berjama'ah teh bet ngagejret pisan, meni teu araya paling ukur sabaris, padahal wangunan teh henteu heureut sapertos kapungkur, ayeuna mah lalega, tur lalugina masjid teh" Jawab ketua DKM semu ngaheruk.

"Aeh apan rarasaan kami mah geus cukup ngabantu teh, ti mimiti kabutuhan bahan bangunan, nepi ka biaya nu sejenna kabeh ge pamere kami, ayeuna PIRAKU KUDU JEUNG SHOLATNA ONGKOH ngabantuan teh?" Ceuk Donatur, bari tuluy ngoloyong ninggalkeun ketu DKM nu molohok.

 Caaag.

4. IEU MAH NILEP

Punten ah ! rada cawokah, Saba'da isya, si aki geus nulakkan maneh, kabeh jandela geus di tutupan euweuh nu molongo, lampu di tengah imah dipareuman. Geus kitu mah tuluy ngadeukeutan si nini, bari pok nyarita semu nu ngarayu:

"Nini ! Ayeuna mah da tinggal urang duaan, budak jeung incu geus marulang ka imahna sewang-sewangan.."

"Emang aya naon kitu.." Ceuk si nini ngajanggilek malik nanya.

"Heueuh geus heubeul urang teu papangantenan" Ceuk si aki

"Lah, geus kolot urang teh". Ceuk si nini

Geus kitu mah teu kadenge deui nanaon. Ngan teu rada lila "Jerit !" Si nini ngajerit, bari kadenge nyarita:

"Aduhh Aki ! Geuningan ayeuna mah robah eta teh, ngagedean ngan jiga nu pondok teu siga baheula?"

"Alahh  Nini ! Ieu mah lain ngagedean deuleu." Ceuk si aki semu reuwas

"Ari kitu ku naon Aki ?" Walon si nini malik nanya panasaran. 

"Duh ! Geuningan ieu mah nilep lain ngagedean"

Caaag.

5. MANG JUHA DICEGAT POLISI 

"Trit..!" Kadenge Pulisi niup piriwit, nyetop Mang Juha nu keur nyetir motor. Dieureunkeun ku Pulisi atuh Mang Juha teh reg bae eureun, laju Pulisi teh nyampeurkeun ka Mang Juha bari terus kadenge nyarita. 

 

"Selamat siang Pak !" Ceuk Pulisi bari hormat.

 

"Siang kembali Pak!" Tembal Mang Juha bari tetep anjeucleung di luhur motor teu turun.

"Tolong Pak, bisa di perlihatkan Sim dan STNK !"Ceuk Pulisi.

 

"Ke...ke... Pak! Ada apa ini teh, naha bet saya dieureunkeun? Saya salah apa Pak?" Ceuk Mang Juha malik nanya. 

 

"Maaf Pak! Tadi Bapak menerobos perboden, jadi saya tilang" Ceuk Pulisi ngajelaskeun.

 

"Alah Pak! Naha atuh di tilang, da kamari mah abdi ngalangkung ka sini,henteu di tilang, kumaha atuh aturanana ieu teh." Ceuk Mang Juha semu nu kesel.

 

"Oh begitu ya Pak, jadi kemarin lewat menerobos ke sini juga?" Ceuk Pulisi nanya deui.

 

"Iya Pak betul pisan, kemarin saya lewat jalan sini, teu aya nu nilang Pak, naha bet ayeuna mah ditilang?" Ceuk Mang Juha ngajawab bari keukeuh.

 

"Ya sudah, kalau begitu berarti sekalian sekarang, jadi Bapak kena dua kali tilang, kemarin dan sekarang" Ceuk Pulisi.

 

"Haaar! Kumaha ieu, kaduhung bebeja" Ceuk Mang Juha..bari rada ngahuleng. 

 

Caaag.